मोठ्या बॉलीवूड चित्रपटांचे यश प्रामुख्याने महानगरे आणि मल्टिप्लेक्सपुरते मर्यादित असते, असा समज अनेक वर्षांपासून होता. मात्र रणवीर सिंग अभिनीत ‘धुरंधर’ या चित्रपटाने ही धारणा पूर्णपणे खोटी ठरवली आहे. मोठ्या शहरांमध्ये दमदार कामगिरी केल्यानंतर आता हा चित्रपट लहान शहरांमध्ये आणि दुर्गम भागांमध्येही प्रेक्षकांना खेचून घेत आहे.
काश्मीरमध्ये अनेक वर्षांपासून चित्रपटगृहांची कमतरता आहे. मोठे मल्टिप्लेक्स आणि अत्याधुनिक थिएटर नसल्यामुळे येथील प्रेक्षक अनेकदा नवीन हिंदी चित्रपटांपासून वंचित राहतात. मात्र ‘धुरंधर’च्या बाबतीत चित्र वेगळे दिसून येत आहे.
काश्मीरमधील शोपियां आणि पुलवामा येथे चित्रपटाचे शो हाऊसफुल जात असल्याचे समोर आले आहे. स्थानिक प्रेक्षकांनी चित्रपटाला भरभरून प्रतिसाद दिला असून, थिएटरबाहेरही उत्साहाचे वातावरण पाहायला मिळत आहे.
‘धुरंधर’चे (Dhurandhar)यश केवळ रणवीर सिंगच्या स्टार पॉवरपुरते मर्यादित नाही. परवडणारे तिकीट दर आणि लहान आकाराची, स्थानिक थिएटर्स यामुळे हा चित्रपट सामान्य प्रेक्षकांपर्यंत पोहोचू शकला आहे. या भागांतील थिएटर मोठ्या मल्टिप्लेक्ससारखा प्रीमियम अनुभव देत नसले तरी, ते स्थानिक गरजांनुसार सिनेमा थेट लोकांपर्यंत पोहोचवत आहेत. त्यामुळेच छोट्या शहरांमध्येही ‘धुरंधर’ला चांगला प्रतिसाद मिळत आहे.
बॉक्स ऑफिसवरही ‘धुरंधर’ने इतिहास रचला आहे. SACNILC च्या आकडेवारीनुसार, चित्रपटाने दुसऱ्या रविवारी म्हणजेच दहाव्या दिवशी तब्बल ₹59 कोटींची कमाई केली. याआधी शनिवारीही चित्रपटाने ₹53 कोटी कमावले होते. रिलीज झाल्यानंतर दुसऱ्या रविवारी मिळालेली ही सर्वाधिक कमाई मानली जात आहे.
धुरंधर’ने अवघ्या 10 दिवसांत ₹350 कोटींचा टप्पा पार केला आहे. विशेष म्हणजे दुसऱ्या आठवड्यातही चित्रपटाची गती कमी झालेली नाही. अनेक मोठ्या चित्रपटांना मागे टाकत, ‘धुरंधर’ आता नवे बॉक्स ऑफिस विक्रम मोडण्याच्या मार्गावर आहे.एकूणच, महानगरांपासून ते काश्मीरमधील लहान शहरांपर्यंत पोहोचलेला ‘धुरंधर’ वर्षअखेरीस 2025 मधील सर्वात मोठा चित्रपट ठरण्याची दाट शक्यता व्यक्त केली जात आहे.
दैनिक बोंबाबोंबचा व्हॉट्सॲप ग्रुप जॉईन करण्यासाठी या लिंकवर क्लिक करा
हेही वाचा
