फरहान अख्तर हे बॉलिवूडमधील मोजक्या कलाकारांपैकी एक आहेत, ज्यांनी फिल्म इंडस्ट्रीतील जवळपास 70 टक्के क्षेत्रांमध्ये आपली छाप उमटवली आहे. अभिनय, दिग्दर्शन, लेखन, गायन आणि निर्मिती अशा अनेक भूमिका यशस्वीपणे निभावत फरहानने स्वतःला एक ऑलराऊंडर कलाकार म्हणून सिद्ध केले आहे. आज फरहान अख्तर 52 वर्षांचे झाले असून, त्यांच्या वाढदिवसानिमित्त त्यांच्या करिअर आणि वैयक्तिक आयुष्याचा खास आढावा घेऊया.
9 जानेवारी 1974 रोजी मुंबईत जन्मलेल्या फरहान अख्तरांचे वडील जावेद अख्तर हे हिंदी सिनेसृष्टीतील दिग्गज लेखक आहेत. सलीम-जावेद यांच्या लेखणीतून जन्मलेल्या सुपरहिट चित्रपटांच्या वातावरणात फरहान मोठे झाले. त्यामुळे चित्रपटांची ओढ त्यांच्यात लहानपणापासूनच होती.
फरहान अख्तर (Farhan Akhtar)यांनी अवघ्या 27 व्या वर्षी दिग्दर्शनात पदार्पण करत 2001 मध्ये ‘दिल चाहता है’ हा चित्रपट सादर केला. या चित्रपटाने तरुणाईचा विचार, मैत्री आणि आयुष्याकडे पाहण्याची दृष्टीच बदलून टाकली. हा चित्रपट केवळ सुपरहिटच ठरला नाही, तर तो आजही एक कल्ट क्लासिक मानला जातो. त्यानंतर 2004 मध्ये ‘लक्ष्य’ चित्रपटाचे दिग्दर्शन करत फरहानने पुन्हा एकदा आपली दिग्दर्शकीय क्षमता सिद्ध केली.
फरहान अख्तर हे पुरस्कारांचेही बादशाह आहेत. आजपर्यंत त्यांनी 50 हून अधिक पुरस्कार आपल्या नावावर केले आहेत. पहिल्याच चित्रपटासाठी राष्ट्रीय पुरस्कार मिळवणारे फरहान हे एक वेगळेच उदाहरण आहेत. ‘भाग मिल्खा भाग’सारख्या चित्रपटात त्यांनी साकारलेला मिल्खा सिंग आजही प्रेक्षकांच्या लक्षात आहे. अभिनयासोबतच निर्माते म्हणूनही त्यांनी अनेक दमदार कथा प्रेक्षकांसमोर आणल्या आहेत.
फरहान अख्तर ओटीटी प्लॅटफॉर्मवरही सक्रिय आहेत. ‘मिर्झापूर’सारख्या सुपरहिट वेब सीरिजच्या निर्मितीमागेही त्यांचा मोठा वाटा आहे. अलीकडेच प्रदर्शित झालेला ‘10 बहादुर’ चित्रपट समीक्षकांकडून प्रशंसित झाला, जरी बॉक्स ऑफिसवर तो फारसा चालला नसला तरी.
फरहान अख्तर यांनी 2000 साली अधुना भबानी यांच्याशी लग्न केले होते. मात्र 16 वर्षांच्या संसारानंतर 2016 मध्ये दोघांचा घटस्फोट झाला. त्यानंतर फरहानने अभिनेत्री शिबानी दांडेकर हिच्याशी विवाह केला.बहुआयामी कला, दमदार कथा आणि वेगळ्या विचारसरणीमुळे फरहान अख्तर आजही बॉलिवूडमध्ये एक महत्त्वाचे नाव आहे. त्यांच्या पुढील प्रोजेक्ट्सकडे चाहत्यांचे लक्ष लागून आहे.
दैनिक बोंबाबोंबचा व्हॉट्सॲप ग्रुप जॉईन करण्यासाठी या लिंकवर क्लिक करा
हेही वाचा
