ऑस्कर विजेते संगीतकार ए.आर. रहमान यांची कीर्ती आज जगभरात पसरलेली आहे. मात्र, या यशाच्या शिखरापर्यंत पोहोचण्यासाठी त्यांनी अपार संघर्ष आणि कठोर परिश्रम केले आहेत. त्यांच्या आयुष्यात अनेक कठीण टप्पे आले, त्यातील सर्वात मोठा आघात म्हणजे लहान वयात वडिलांचे निधन. आज, ६ जानेवारी रोजी ए.आर. रहमान यांचा वाढदिवस असून, या निमित्ताने त्यांच्या आयुष्यातील या भावनिक आणि प्रेरणादायी प्रवासावर एक नजर टाकूया.
ए.आर. रहमान (A.R. Rahman,) यांचा जन्म एका हिंदू कुटुंबात झाला होता. त्यांचे बालपणीचे नाव दिलीप कुमार होते. त्यांच्या आयुष्यात मोठा बदल वडील आर.के. शेखर यांच्या निधनानंतर झाला. आर.के. शेखर हे त्यांच्या काळातील प्रसिद्ध संगीतकार होते आणि त्यांनी १०० हून अधिक मल्याळम चित्रपटांसाठी संगीत दिले होते. रहमान यांनी संगीताचे प्राथमिक धडे आपल्या वडिलांकडूनच घेतले.
आर.के. शेखर यांना कर्करोग झाला होता. उपचारादरम्यान एका सूफी संताच्या संपर्कात आल्यानंतर कुटुंबाच्या आयुष्यात आध्यात्मिक वळण आले. वडिलांच्या निधनानंतर ए.आर. रहमान यांनी सूफीवादात मनःशांती शोधली आणि पुढे इस्लाम स्वीकारला. यानंतर दिलीप कुमार हे नाव बदलून ते अल्लाह राखा रहमान म्हणून ओळखले जाऊ लागले.
ए.आर. रहमान यांनी एका यांच्या पॉडकास्टमध्ये वडिलांच्या शेवटच्या दिवसांबद्दल भावनिक खुलासा केला होता. त्यांनी सांगितले की वडिलांचा अंत इतका वेदनादायक होता की आजही त्या आठवणी मनात येताच ते अस्वस्थ होतात. वडिलांची प्रकृती अत्यंत खालावली होती आणि त्यांचे शेवटचे दिवस रहमान यांच्यासाठी एखाद्या भयानक स्वप्नासारखे होते. याच कारणामुळे ते सहसा वडिलांबद्दल बोलणे टाळतात.
संभाषणादरम्यान रहमान म्हणाले की वडिलांची उदारता, दयाळूपणा आणि आनंदी स्वभाव आजही त्यांना आयुष्यात पुढे जाण्याची प्रेरणा देतो. जरी शेवटचे दिवस वेदनादायक असले, तरी वडिलांचे आशीर्वाद आपल्यासोबत असल्याची भावना त्यांना नेहमीच बळ देते. आईबद्दल बोलताना त्यांनी तिच्या धैर्याचे आणि कणखरतेचे कौतुक केले.
ए.आर. रहमान अवघ्या ९ वर्षांचे असताना त्यांच्या वडिलांचे निधन झाले. यानंतर कुटुंबाची सर्व जबाबदारी त्यांच्या खांद्यावर आली. उदरनिर्वाहासाठी त्यांनी वडिलांची संगीत उपकरणे भाड्याने देण्यास सुरुवात केली. पुढे त्यांनी टीव्ही जिंगल्स तयार केले आणि संगीतात स्वतःची ओळख निर्माण केली. चित्रपट ‘रोजा’ मधील संगीताने त्यांना प्रचंड लोकप्रियता मिळवून दिली आणि येथूनच ए.आर. रहमान यांच्या सुवर्णकारकिर्दीची सुरुवात झाली.
आज ए.आर. रहमान यांची ही संघर्षमय कहाणी लाखो लोकांसाठी प्रेरणादायी ठरत आहे.
दैनिक बोंबाबोंबचा व्हॉट्सॲप ग्रुप जॉईन करण्यासाठी या लिंकवर क्लिक करा
हेही वाचा
अगस्त्य नंदाने उजळले अमिताभ बच्चनांचे नाव, ‘इक्कीस’च्या कमाईवर बिग बींकडून नातवाला खास शुभेच्छा
