‘अमर सिंग चमकिला’ या गाजलेल्या चित्रपटानंतर अभिनेता-गायक दिलजीत दोसांझ पुन्हा एकदा दिग्दर्शक इम्तियाज अलीसोबत काम करताना दिसणार आहे. दिलजीतने स्वतः सोशल मीडियावर या नव्या सहकार्याची माहिती देत चाहत्यांमध्ये उत्सुकता निर्माण केली आहे. त्याने आपल्या इंस्टाग्राम हँडलवर आगामी अनटायटल प्रोजेक्टच्या शूटिंगदरम्यानचे काही फोटो शेअर केले असून, या फोटोंमधून शूटिंग पूर्ण झाल्याचीही पुष्टी केली आहे.
शेअर केलेल्या फोटोंमध्ये दिलजीत तपकिरी रंगाचे जॅकेट, टी-शर्ट आणि काळ्या रंगाची पँट परिधान केलेला दिसत आहे. एका फोटोमध्ये तो दिग्दर्शक इम्तियाज अली यांना आदराने वाकून नमस्कार करताना दिसतो. फोटो शेअर करताना दिलजीतने कॅप्शनमध्ये लिहिले, “इम्तियाज अली सरांच्या चित्रपटाचे शूटिंग पूर्ण झाले आहे.” या पोस्टनंतर सोशल मीडियावर चाहत्यांकडून शुभेच्छांचा वर्षाव होत आहे.
इम्तियाज अली आणि दिलजीत दोसांझ (Diljit Dosanjh) यांनी यापूर्वी ‘अमर सिंग चमकिला’ या चित्रपटात एकत्र काम केले होते. हा चित्रपट प्रसिद्ध पंजाबी लोकगायक अमर सिंग चमकिला यांच्या जीवनावर आधारित होता. 1980 च्या दशकात आपल्या बोल्ड गीतांमुळे आणि दमदार शैलीमुळे चमकिला प्रचंड लोकप्रिय झाला होता. ‘पंजाबचा एल्विस’ म्हणून ओळखल्या जाणाऱ्या चमकिलाचे आयुष्य मात्र फारच अल्प ठरले. 1988 मध्ये वयाच्या अवघ्या 27 व्या वर्षी त्यांची आणि पत्नी अमरजोत कौर यांची निर्घृण हत्या झाली.
एप्रिल 2024 मध्ये नेटफ्लिक्सवर प्रदर्शित झालेल्या ‘अमर सिंग चमकिला’मध्ये परिणीती चोप्रानेही महत्त्वाची भूमिका साकारली होती. इम्तियाज अली आणि साजिद अली यांनी लिहिलेल्या या चित्रपटातील थेट रेकॉर्ड केलेले लोकसंगीत, भावनिक कथा आणि दिलजीतचा सशक्त अभिनय प्रेक्षकांच्या विशेष पसंतीस उतरला.
या चित्रपटानंतर दिलजीत दोसांझचे स्टारडम अधिकच वाढले. त्यांचा अखिल भारतीय संगीत दौरा सुपरहिट ठरला आणि त्यांना देश-विदेशात मोठी लोकप्रियता मिळाली. आता पुन्हा एकदा इम्तियाज अलीसोबतच्या या नव्या प्रोजेक्टकडून प्रेक्षकांना मोठ्या अपेक्षा आहेत. चित्रपटाचे नाव आणि कथेबाबत माहिती अद्याप गुप्त असली, तरी या जोडीची जादू पुन्हा एकदा मोठ्या पडद्यावर पाहायला मिळणार का, याची उत्सुकता सर्वांनाच आहे.
दैनिक बोंबाबोंबचा व्हॉट्सॲप ग्रुप जॉईन करण्यासाठी या लिंकवर क्लिक करा
हेही वाचा
सलमान खानचा आंतरराष्ट्रीय जलवा; रेड सी फिल्म फेस्टिव्हलमधील हॉलीवूड स्टार्ससोबतच्या भेटी व्हायरल
