महान अभिनेते धर्मेंद्र यांच्या निधनाला एक महिना उलटून गेला आहे, आणि आता देओल कुटुंब खासगी आयुष्याला प्राधान्य देताना दिसत आहे. अशातच नुकतीच त्यांची मुलगी व अभिनेत्री ईशा देओल सार्वजनिक ठिकाणी दिसून आली. एअरपोर्टवर स्पॉट झालेल्या ईशाच्या व्हिडिओंनी सोशल मीडियावर मोठी चर्चा निर्माण केली आहे.
एअरपोर्टवर ईशा देओल (Esha Deol)ऑल-ब्लॅक लूकमध्ये दिसून आल्या. त्यांनी ब्लॅक फिटेड क्रू-नेक टी-शर्ट, ब्लॅक पँट आणि डोळ्यांवर स्टायलिश सनग्लासेस घातले होते. सिक्युरिटी चेक-इनकडे जात असताना पॅपराझींनी त्यांना फोटोसाठी थांबण्याची विनंती केली. ईशाने थोडा वेळ थांबून फोटोसाठी पोज दिली, मात्र त्यांच्या चेहऱ्यावर गंभीर आणि थोडी उदास भावभावना स्पष्ट दिसत होती.
याच दरम्यान एका फोटोग्राफरने ईशाला “आप कैसी हैं?” असा प्रश्न विचारला. हा प्रश्न ऐकताच ईशा थोड्या गोंधळल्या आणि हाताच्या इशाऱ्याने हा प्रश्न अयोग्य असल्याचे सूचित केले. त्यानंतर त्यांनी हात जोडत शांतपणे आत प्रवेश केला. हा संपूर्ण व्हिडिओ सध्या सोशल मीडियावर व्हायरल होत असून नेटकऱ्यांच्या प्रतिक्रिया येत आहेत.
अनेक युजर्सनी ईशाच्या वागणुकीला पाठिंबा दिला असून कलाकारांच्या खासगी आयुष्याचा सन्मान केला पाहिजे, असे मत व्यक्त केले आहे. काहींनी पॅपराझींनी विचारलेल्या प्रश्नांवर नाराजीही व्यक्त केली आहे.
दरम्यान, धर्मेंद्र यांच्या आगामी चित्रपटाबाबत बोलायचे झाल्यास, त्यांची शेवटची ऑनस्क्रीन उपस्थिती ‘इक्कीस’ या चित्रपटात पाहायला मिळणार आहे. श्रीराम राघवन यांच्या दिग्दर्शनाखाली तयार झालेल्या या वॉर ड्रामामध्ये अगस्त्य नंदा मुख्य भूमिकेत असून धर्मेंद्र त्यांच्या वडिलांच्या भूमिकेत दिसणार आहेत. हा चित्रपट आधी २५ डिसेंबरला प्रदर्शित होणार होता, मात्र आता तो १ जानेवारी २०२६ रोजी नववर्षाच्या मुहूर्तावर प्रदर्शित होणार आहे. नुकतेच सनी देओल, बॉबी देओल आणि ईशा देओल यांनी या चित्रपटाच्या बिहाइंड-द-सीन झलक शेअर करत चाहत्यांमध्ये उत्सुकता वाढवली आहे.
दैनिक बोंबाबोंबचा व्हॉट्सॲप ग्रुप जॉईन करण्यासाठी या लिंकवर क्लिक करा
हेही वाचा
विद्युत जामवालने चेहऱ्यावर जळत्या मेणबत्तीचे मेण ओतले, व्हिडिओ व्हायरल
