कोरोनाला पराभूत करत एड शीरन २ आठवड्यांच्या आयसोलेशनमधून बाहेर, गायकाच्या चिमुकल्या मुलीलाही झाला होता कोरोना

जगभरात थैमान घातलेल्या कोरोना व्हायरसमुळे सर्वांनाच संकटात टाकले. अनेक कलाकार कोरोना व्हायरसच्या विळख्यात अडकून हे जग सोडून गेले. मात्र, काही कलाकारांनी या व्हायरसवर विजय मिळवला. यामध्ये हॉलिवूड गायक एड शीरनचाही समावेश आहे. एड शीरनने २ आठवड्यांचा क्वारंटाईन कालावधी पूर्ण केला आहे. त्याने क्वारंटाईनमधून बाहेर आल्यानंतर आपल्याला झालेल्या त्रासाबाबत सांगितले आहे.

क्वारंटाईनमधून बाहेर आल्यानंतर ग्रॅमी अवॉर्ड विजेता एड शीरन म्हणाला की, हे दोन आठवडे खूप कठीण होते. त्याच्यासोबत त्याची मुलगीही कोरोना पॉझिटिव्ह आढळली होती. त्याची मुलगी अवघ्या १५ महिन्यांची आहे. त्याच्यासाठी आपली मुलगी लायराला असे पाहणे खूपच कठीण होते. (Hollywood Singer Ed Sheeran Came Out of Isolation Told His Daughter Was Also Covid Positive)

पत्नी दूर झाल्यानंतर मुलीसोबत होता शीरन
त्याने एका शोदरम्यान चर्चा करताना सांगितले की, “माझी पत्नी दूर होती. त्यामुळे मी माझ्या मुलीसोबत तिथे होतो. तिच्या जवळही होतो. त्यामुळे हे कठीण होते.” पुढे त्याने सांगितले की, “तीन दिवस खरंच खूप वाईट होते. जगापुढे येऊन हे सांगणे खूप विचित्र आहे. मी अजूनही उपचाराच्या प्रक्रियेतच आहे.”

पुढे बोलताना शीरन म्हणाला, “मला खरोखर सर्वांसाठी याची घोषणा करायची नव्हती. मात्र, मला इंग्लंडमध्ये ३ मोठ्या गोष्टी रद्द कराव्या लागल्या. मला कठोर व्हायचे नव्हते.”