मल्याळम फिल्म इंडस्ट्रीत सध्या तणावाचे वातावरण आहे. इंडस्ट्रीतील अनेक अभिनेत्रींनी फिल्म इंडस्ट्रीतील प्रसिद्ध व्यक्तींवर लैंगिक छळ केल्याचे आरोप केले आहेत. आता मल्याळम चित्रपट दिग्दर्शक जोशी जोसेफ यांनीही या संपूर्ण प्रकरणावर आणि सुरू असलेल्या वादावर प्रतिक्रिया दिली आहे. ते म्हणाले की, मल्याळम फिल्म इंडस्ट्रीवर आज मोठे संकट आले आहे.
जोशी जोसेफ म्हणाले, ‘एक विशेष तपास पथक (एसआयटी) माझ्या घरी आले आणि आम्ही त्यांच्याशी सुमारे तीन तास चर्चा केली. मी IPC च्या कलम 161 अंतर्गत सुरुवातीपासूनच्या घटनांची तपशीलवार माहिती त्यांना दिली. मी कलम 164 अन्वये आणखी एक निवेदन दंडाधिकाऱ्यांसमोर देईन. १० सप्टेंबरला श्रीलेखा मित्राला घेऊन येत आहोत. आज मल्याळम उद्योग खरोखर संकटातून जात आहे आणि त्याचा आम्हाला दोष दिला जात आहे.
बंगाली अभिनेत्री श्रीलेखा मित्रा हिने सोमवारी लोकप्रिय मल्याळम चित्रपट दिग्दर्शक रंजित यांच्या विरोधात कोची शहर पोलिसात तक्रार दाखल केल्याची माहिती आहे. त्याच्या एक दिवस आधी रंजित यांनी केरळ स्टेट फिल्म अकादमीचा राजीनामा दिला होता. कोची शहर पोलीस आयुक्तांना पाठवलेल्या ईमेलमध्ये मित्रा यांनी २००९ मधील एका घटनेची माहिती दिली. तिने सांगितले की ती पलेरीमानिकम नावाच्या चित्रपटातील भूमिकेवर चर्चा करण्यासाठी कोचीमध्ये होती आणि हा चित्रपट रंजित दिग्दर्शित करत होते. चित्रपटाविषयी चर्चा करण्यासाठी दिग्दर्शकाने तिला कलूर कडवंथरा येथील त्याच्या फ्लॅटवर बोलावले होते, असा आरोप अभिनेत्रीने केला आहे. फ्लॅटमध्ये सुरू असलेल्या संभाषणादरम्यान रणजीतने तिचा हात घट्ट पकडून ठेवला आणि नंतर सेक्स करण्याच्या उद्देशाने तिच्या अंगाला हात लावला.
श्रीलेखाने सांगितले की, ‘मला धोका लक्षात येताच मी तिथून पळ काढला आणि मी ज्या हॉटेलमध्ये थांबले होते तिथे आले. माझा हा वाईट अनुभव मी दुसऱ्या दिवशी पटकथा लेखक जोशी जोसेफ यांना सांगितला. ‘मला परतीचे तिकीट देण्यात आले नाही, त्यामुळे मी जोशी जोसेफ यांच्याकडे मदत मागितली’, असेही या अभिनेत्रीने तिच्या लेखी तक्रारीत म्हटले आहे. तिची लेखी तक्रार देताना, अभिनेत्रीने असेही सांगितले की ती कोलकाताची आहे आणि तिला दक्षिणेकडील स्थानिक कायदेशीर प्रक्रिया समजत नाही, म्हणून तिने यापूर्वी तक्रार केली नव्हती. आता तिने मेलद्वारे तक्रार दाखल केली आहे. श्रीलेखा व्यतिरिक्त इतर अनेक अभिनेत्रींनी प्रसिद्ध अभिनेते आणि दिग्दर्शकांवर लैंगिक शोषणाचे आरोप केले आहेत.
दैनिक बोंबाबोंबचा व्हॉट्सॲप ग्रुप जॉईन करण्यासाठी या लिंकवर क्लिक करा
हेही वाचा –
‘लक्झरी इज नॉट एव्हरीथिंग’ या पोस्टसाठी बेबो ट्रोल झाली, लोकांनी करून दिली पतौडी पॅलेसची आठवण
