हिंदी चित्रपट क्षेत्रातील कलाकार आणि त्यांच्यासाठी वेडे झालेले चाहते यांंच्या अनेक कहाण्या आपल्याला नेहमीच ऐकायला मिळत असतात. हे चाहते त्यांच्या लाडक्या हिरोची एक झलक पाहण्यासाठी काहीही करायला तयार असतात. असाच काहीसा प्रकार अभिनेता सलमान खानच्या (Salman Khan) बाबतीत घडला आहे. या घटनेचा व्हिडिओ सध्या सोशल मीडियावर वेगाने व्हायरल होत आहे. या व्हायरल व्हिडिओमध्ये सलमान खानला भेटण्यासाठी आतुर झालेली एक चाहती रडताना दिसत आहे. काय आहे हा सगळा प्रकार चला जाणून घेऊ.
बॉलिवूडचा दबंग सलमान खानच्या लोकप्रियतेची माहिती तर आपणा सर्वांनाच आहे. बॉलिवूडचा मोस्ट इलिजेबल बॅचलर म्हणून त्याचे नाव घेतले जाते. सलमानच्या लोकप्रियतेच्या अनेक कथा आहेत. म्हणूनच त्याच्या फक्त नावावरच कोणताही चित्रपट सुपरहिट ठरत असतो. अनेक तरुणी भाईजानवर फिदा आहेत. त्यामुळेच त्याला तरुणाईच्या गळ्यातील ताईत म्हणून ओळखले जाते. आता सलमान खानच्या अशाच एका जबरा फॅनचा व्हिडिओ समोर आला आहे.
हा व्हिडिओ सलमान खानच्या दबंग टुरमधील आहे, जो सध्या दुबईमध्ये सुरू आहे. यामध्ये आयुष शर्मा, सोनाक्षी सिन्हा, दिशा पटानी, गुरू रंधावा असे अनेक दिग्गज कलाकार सहभागी झाले होते. यावेळी समोर तुफान गर्दी पाहायला मिळत होती. याच चाहत्यांच्या गराड्यातील एका तरुणीचा व्हिडिओ सध्या चर्चेत आहे. हा व्हायरल व्हिडिओ एका चाहत्याकडूनच प्रसारित केला गेला आहे, ज्यामध्ये एक मुलगी स्टेजशेजारी उभी राहून रडत असल्याचे दिसत आहे. तर दुसरी मुलगी तिला शांत करण्याचा प्रयत्न करत आहे. मात्र तरीही ती तरुणी मला सलमान खानला भेटायचे आहे असे म्हणत रडताना दिसत आहे. शेवटी कार्यक्रमाचा होस्ट मनीष पॉलने त्या मुलीला शांत करत सलमान खानला भेटायला मिळेल अशी ग्वाही दिल्यानंतर ती शांत झाल्याचे पाहायला मिळत आहे.
या कार्यक्रमातील सलमान खानच्या दमदार एंट्रीने चाहत्यांच्या काळजाचा ठोका चुकवला होता. दबंग गाण्यावर झालेली सलमान खानची धमाकेदार एंट्री पाहून प्रत्येकजण वेडा झाला होता. यावेळी सलमान खानचा दमदार डान्स पाहायला मिळाला. या टुरमध्ये सलमान खानने त्याच्या भाच्यांनाही सोबत नेले आहे. काही दिवसांपूर्वी त्यांच्यासोबत खेळतानाचा एक व्हिडिओ समोर आला होता.
हेही वाचा –
- अनन्या पांडेने सिद्धांत चतुर्वेदीला दिला तिच्यापासून लांब राहण्याचा सल्ला, काय आहे भानगड?
- पतीसोबत घटस्फोट घेतल्यानंतर, पुन्हा प्रेमात पडली समंथा! फोटो शेअर करत दिली माहिती
- कॅमेऱ्यासमोर पुन्हा बोल्ड झाली ईशा गुप्ता, जॅकेटची बटणं काढत केलं फोटोशूट
