९०च्या दशकात आपल्या अभिनयाने प्रेक्षकांच्या मनात खास स्थान निर्माण करणारे अभिनेता दीपक तिजोरी आज मोठ्या पडद्यापासून दूर असले, तरी एकेकाळी त्यांनी अनेक गाजलेल्या चित्रपटांतून वेगळी ओळख निर्माण केली होती. हिरो म्हणून फारशी संधी न मिळाली, तरी ‘जो जीता वही सिकंदर’, ‘कभी हां कभी ना’, ‘अंजाम’, ‘खिलाडी’, ‘पहिला नशा’ आणि ‘दो लफ्जों की कहानी’ यांसारख्या चित्रपटांमधील त्यांच्या भूमिका आजही लक्षात राहिल्या आहेत. आता दीपक तिजोरी कमी प्रमाणात पडद्यावर दिसत असले, तरी त्यांची मुलगी समारा तिजोरी (Samara Tijor)अभिनयविश्वात आपलं स्थान निर्माण करण्याच्या तयारीत आहे.
दीपक तिजोरी यांनी 2003 मध्ये फॅशन डिझायनर शिवानी यांच्याशी विवाह केला होता. या दाम्पत्याला समारा नावाची एक मुलगी आहे. वयाच्या 13व्या वर्षी समाराचं अपहरण झाल्याची धक्कादायक घटना घडली होती, मात्र सुदैवाने ती किडनॅपर्सच्या तावडीतून सुरक्षित सुटली. 2017 साली दीपक तिजोरी आणि शिवानी यांच्या वैवाहिक आयुष्याबाबत बरीच चर्चा झाली होती. दोघांमध्ये गंभीर आरोप-प्रत्यारोप झाले होते आणि वेगळं राहण्याच्याही बातम्या समोर आल्या होत्या.
समारा तिजोरी आधीच अभिनयात पदार्पण करू शकली. 2022 मध्ये प्रदर्शित झालेल्या वेब सीरिज ‘मासूम’मुळे ती चर्चेत आली होती. या सीरिजमध्ये तिने बोमन इराणी आणि उपासना सिंह यांच्यासोबत काम केलं होतं आणि तिच्या अभिनयाचं प्रेक्षकांकडून कौतुकही झालं.
आता समारा लवकरच भूमी पेडणेकरसोबत ‘दलदल’ या नव्या वेब सीरिजमध्ये महत्त्वाच्या भूमिकेत दिसणार आहे. नुकताच या सीरिजचा ट्रेलर प्रदर्शित झाला असून, त्यातील काही अंगावर शहारे आणणारे प्रसंग सध्या चर्चेचा विषय ठरत आहेत. विश्व धामिजा यांच्या ‘भिंडी बाजार’ या बेस्टसेलर पुस्तकावर आधारित या सीरिजचं दिग्दर्शन अमृत राज गुप्ता यांनी केलं आहे. ‘दलदल’ ३० जानेवारी रोजी प्राइम व्हिडिओवर रिलीज होणार आहे.
समारा केवळ अभिनेत्रीच नाही, तर ती एक उत्तम नृत्यांगनाही आहे. तिने जेफ गोल्डबर्ग अॅक्टिंग स्टुडिओमध्ये अभिनयाचं प्रशिक्षण घेतलं असून, कथक, जॅझ, कंटेम्पररी आणि बॉलिवूड डान्समध्येही ती प्रशिक्षित आहे. हळूहळू पण ठाम पावलांनी समारा तिजोरी मनोरंजनसृष्टीत स्वतःची ओळख निर्माण करत असल्याचं चित्र सध्या दिसत आहे.
दैनिक बोंबाबोंबचा व्हॉट्सॲप ग्रुप जॉईन करण्यासाठी या लिंकवर क्लिक करा
हेही वाचा
अक्षय कुमारने सांगितलं रागात ट्विंकल खन्ना काय करते; हे ऐकून रितेश देशमुख–जेनेलियाला हसू आवरेना
