चित्रपटसृष्टीतील प्रसिद्ध कपूर कुटुंबातील अभिनेत्री शनाया कपूरने (Shanaya Kapoor)यावर्षी ‘आँखों की गुस्ताखियां’ या बहुप्रतिक्षित चित्रपटातून अभिनय क्षेत्रात पदार्पण केले. राष्ट्रीय पुरस्कार विजेते अभिनेता विक्रांत मेस्सीसोबत तिने मुख्य भूमिका साकारली होती. मात्र, हा चित्रपट बॉक्स ऑफिसवर अपेक्षित यश मिळवू शकला नाही. आता या अपयशावर शनायाने पहिल्यांदाच स्पष्टपणे प्रतिक्रिया दिली आहे.
एका मुलाखतीत शनाया म्हणाली, “कोणताही चित्रपट चांगला चालला नाही, तेव्हा थोडं दुःख होतंच. प्रेक्षकांनी थिएटरमध्ये जाऊन आपला चित्रपट पाहावा, असं प्रत्येक कलाकाराला वाटतं. पण मला प्रेक्षकांकडून जे प्रेम मिळालं, ते माझ्यासाठी खूप मोठं होतं. माझा पहिला चित्रपट प्रदर्शित झाला, हीच गोष्ट माझ्या आतल्या मुलाला आनंद देणारी होती.”
चित्रपटाच्या अपयशानंतर अनेकांनी तिला धीर दिला, असे सांगत शनायाने पुढे म्हटले, “लोक मला ‘सगळं ठीक होईल’ असं सांगत होते. पण त्या क्षणी मला एवढंच वाटत होतं की मी माझ्या परीने पूर्ण प्रयत्न केला आणि माझा पहिला चित्रपट प्रेक्षकांसमोर आला. याचा मला खूप अभिमान आहे.”
आँखों की गुस्ताखियां’बद्दल बोलताना शनायाने स्पष्ट केले की तिला आजही या चित्रपटाचा अभिमान आहे. “माझ्या इंस्टाग्राम बायोमध्ये आजही ‘आँखों की गुस्ताखियां ZEE5 वर उपलब्ध आहे’ असंच लिहिलं आहे. हा चित्रपट माझ्या करिअरची सुरुवात आहे आणि लोकांनी तो पाहावा, असं मला मनापासून वाटतं,” असे ती म्हणाली.
संतोष सिंग दिग्दर्शित ‘आँखों की गुस्ताखियां’ या चित्रपटाने बॉक्स ऑफिसवर निराशा केली. SACNILCच्या अहवालानुसार, या चित्रपटाने भारतात केवळ ₹1.71 कोटींची कमाई केली, त्यामुळे तो फ्लॉप ठरला. चित्रपटात विक्रांत मेस्सीने एका दृष्टिहीन व्यक्तीची भूमिका साकारली होती. बॉक्स ऑफिसवरील अपयश असूनही, शनाया कपूर आपल्या पदार्पणाबाबत सकारात्मक असून पुढील प्रोजेक्ट्सकडे आत्मविश्वासाने पाहत असल्याचे तिच्या वक्तव्यातून स्पष्ट होते.
दैनिक बोंबाबोंबचा व्हॉट्सॲप ग्रुप जॉईन करण्यासाठी या लिंकवर क्लिक करा
हेही वाचा
पापाराझींवर भडकली अंकिता लोखंडे; नेमकं काय घडलं? जाणून घ्या संपूर्ण प्रकरण
