सोनू निगमने (Sonu Nigam) “अभी मुझे मैं कहें,” “संदेसे आते हैं,” “तुमसे मिलके दिल का,” आणि “बोले चुडियाँ” सारखी अनेक गाणी गायली आहेत. सोनू हा भारतातील सर्वात यशस्वी आणि बहुमुखी गायक मानला जातो. त्याच्या सुरेल आवाजाचे लोकांना वेड लागले आहे. सोनू लवकरच त्याचा ‘दीवाना तेरा’ टूर सुरू करणार आहे. या दौऱ्यात सोनू अनेक शहरांमध्ये परफॉर्म करणार आहे.
सोनू निगमने त्याच्या इंस्टाग्रामवर या कार्यक्रमाची घोषणा केली आणि लिहिले, “१४ डिसेंबर, गुवाहाटी कधीही विसरणार नाही अशी रात्र. सोनू निगम – दीवाना तेरा, लाईव्ह.” ९ डिसेंबर रोजी गुवाहाटीमध्ये पोस्ट मालोनच्या शोनंतर लगेचच हा संगीत कार्यक्रम होत आहे.
सोनू निगम म्हणाले की, गुवाहाटी येथून दौऱ्याची सुरुवात करणे हा त्यांच्यासाठी खूप खास आणि वैयक्तिक निर्णय आहे, कारण हे शहर त्यांचे जवळचे मित्र, दिवंगत झुबीन गर्ग यांच्या आठवणींशी जोडलेले आहे. झुबीनच्या निधनाने सोनू खूप दुःखी आहे. त्यांनी सांगितले की आसामच्या लोकांनी झुबीन गर्गला दाखवलेले प्रेम आणि आदर त्यांनी इतर कुठेही पाहिलेला नाही.
गुवाहाटीनंतर, ‘दीवाना तेरा’ दौरा इंदूर, जयपूर आणि लखनऊ येथेही होणार आहे. सोनू निगम एका खास लाईव्ह शोमध्ये त्यांची आवडती गाणी गाणार आहेत. या दौऱ्यापूर्वी, सोनूने त्यांच्या ५२ व्या वाढदिवशी ‘सतरंगी रे’ नावाच्या सात शहरांच्या दौऱ्यावर सुरुवात केली होती, ज्यामध्ये मुंबई, हैदराबाद, कोलकाता, अहमदाबाद, पुणे, शिलाँग आणि दिल्ली-एनसीआर यांचा समावेश होता.
