अभिनेत्री आलिया भट्ट आजकाल अनेक चित्रपटांच्या चित्रीकरणामध्ये व्यस्त आहे. सध्या तिच्यावर कामाचा अतिरिक्त ताण वाढला आहे. ज्यामुळे तिची तब्येत अचानक खालावली होती. ताण आणि थकवा यामुळे आलियाला १७ जानेवारीला मुंबईतील रुग्णालयात दाखल करण्यात आलं होतं. परंतु, काही तासांनंतर तिला सोडण्यातही आले.
माध्यमांमधील वृत्तांनुसार, आलियाला सर एचएन रिलायन्स रुग्णालयात दाखल करण्यात आलं होतं. तब्येत रिकव्हर झाल्याने त्याच दिवशी तिला डिस्चार्जही देण्यात आला. बरी झाल्यानंतर आलियाने सोमवारी १८ जानेवारी सकाळी ‘गंगूबाई काठियावाडी’ चित्रपटाच्या सेट गाठला आणि पुन्हा शुटिंगला सुरुवात केली आहे. मात्र, आलियाला रुग्णालयात दाखल करण्याबाबत चित्रपटाच्या टीमकडून कोणतीही अधिकृत माहिती समोर आलेली नाही.
आलियाचा ‘गंगूबाई काठियावाडी’ हा चित्रपट यंदा दिवाळीत रिलीज होऊ शकतो. आलियाशिवाय संजय लीला भन्साळींच्या या चित्रपटात विजय राज, शंतनू माहेश्वरी आणि सीमा पाहवा हे देखील मुख्य भूमिका साकारत आहेत. ‘गंगूबाई’ शिवाय आलिया भट्ट दिग्दर्शक अयान मुखर्जीच्या ‘ब्रह्मास्त्र’ आणि ‘बाहुबली’ फेम दिग्दर्शक एस.एस. राजामौलीच्या आगामी ‘आरआरआर’ चित्रपटातही झळकणार आहे.
सध्या आलियाच्या चित्रपटांच्या तारखा अगदी फुल्ल आहेत. काही दिवसांपूर्वी नववर्षाच्या सुरुवातीला रणबीर आणि आलीया हे राजस्थानमध्ये जाऊन साखरपुडा करणार असल्याच्या चर्चांना उधाण आलं होतं. परंतु रणबीरचे काका रणधीर कपूर यांनी या चर्चांना अफवा सांगून पूर्णविराम लावला होता.
रणबीर आणि आलीया हे एकमेकांच्या प्रेमात इतके आकंठ बुडाले आहेत की त्यांना लवकरात लवकर लग्न करायचं आहे अशा चर्चा आहेत. कारण स्वतः रणबीरने मागच्यावर्षी माध्यमांशी बोलताना ‘कोव्हीड वगैरे नसतं तर लग्न करणार होतो’ असं विधान केलं होतं. असो यावर्षी कोव्हीड१९ वरची लस देखील उपलब्ध झाली आहे आणि जगभरात लसीकरण देखील सुरू झाले आहे. यावर्षी तरी रणबीर आणि आलियाच्या घरी सनई चौघडे वाजणार का याची दोघांच्याही चाहत्यांना उत्सुकता लागली आहे.
