बॉलीवूडचा खिलाडी कुमार म्हणजेच अक्षय कुमार लवकरच त्याच्या आगामी ‘अतरंगी रे’ मधून प्रेक्षकांच्या भेटीला येणार आहे. ५३ वर्षीय अक्षय ३० पेक्षा जास्त वर्षांपासून बॉलीवूडमध्ये काम करत आहे. अक्षयने त्याच्या इतक्या वर्षांच्या कारकिर्दीत अनेक चांगले सिनेमे केले आहेत. शिवाय त्याने या चित्रपटांमधून विविध भूमिका देखील रंगवल्या आहेत.
सध्या अक्षय त्याच्या ‘अंतरंगी रे’ चित्रपटाच्या शूटिंगमध्ये व्यस्त आहे. या सिनेमात तो एका मुस्लिम युवकाच्या भूमिकेत दिसणार आहे. अक्षय त्याच्या करियरमध्ये पाचव्यांदा मुस्लिम भूमिका निभावणार आहे. यापूर्वी अक्षयने ‘इंसान’, ‘वंस अपॉन ए टाइम इन मुंबई’, ‘ढिशूम’ आणि ‘लक्ष्मी या चित्रपटांमध्ये मुस्लिम व्यक्तिरेखा साकारल्या आहेत.
आता अक्षय अतरंगी रे सिनेमात पुन्हा एकदा सज्जाद अली ह्या मुस्लिम युवकाची भूमिका करत आहे. या चित्रपटाची थोडी शूटिंग आगऱ्यातील ताजमहलजवळ नुकतीच पूर्ण झाली. सज्जाद हा एक जादूगार आहे आणि चित्रपटाच्या कथेनुसार तो त्याच्या जादूने ताजमहाल गायब करतो. त्याच्या या जादूमुळे सारा अली खानची व्यक्तिरेखा खूप प्रभावित होते. अशी कथेची एक बाजू आहे.
ताजमहालाजवळ या सिनेमाची शूटिंग चालू असताना साराने अक्षयचा मुघल राजा शहाजनच्या रुपातला गुलाबाचे फुल घेतला एक फोटो तिच्या अकाऊंटवरून पोस्ट केला होता. यासोबतच अक्षयने देखील याच रुपातला पण डान्स करतानाच एक व्हिडिओ शेयर केला होता.
या चित्रपटात अक्षय सोबत, धनुष आणि सारा अली खान मुख्य भूमिका निभावणार असून, हे तिघे पहिल्यांदाच पडद्यावर एकत्र दिसणार आहे. या चित्रपटाचे दिग्दर्शन आनंद एल राय हे करत असून, संगीत ए.आर.रहमान यांचे असणार आहे. या चित्रपटाची शूटिंग २०२० मधेच सुरु झाली होती, मात्र कोरोनामुळे ही शूटिंग पुढे ढकलण्यात आली. आता या सिनेमाची शूटिंग पूर्ण झाली असून हा सिनेमा ह्या वर्षात प्रेक्षकांच्या भेटीला येणार आहे.
