फिल्म इंडस्ट्रीत असे अनेक कलाकार आहेत, ज्यांनी लहान वयातच आपल्या अभिनयाने प्रेक्षकांसह समीक्षकांचे लक्ष वेधून घेतले. बालवयात अभिनयातील बारकावे समजून घेणे, भूमिकेतील भावना आत्मसात करणे आणि संवादांमधून कथा जिवंत करणे हे सोपे काम नाही. यासाठी सातत्यपूर्ण सराव, प्रचंड समर्पण आणि शिकण्याची ओढ आवश्यक असते. या सर्व गुणांचा उत्तम नमुना म्हणजे अभिनेता हर्ष मायर, ज्यांनी बालकलाकार म्हणून स्वतःची वेगळी ओळख निर्माण करत थेट राष्ट्रीय चित्रपट पुरस्कार पटकावला.
हर्ष मायरने (Harsh Mayar)2010 साली प्रदर्शित झालेल्या कॉमेडी-ड्रामा चित्रपट ‘आय अॅम कलाम’ मधून अभिनय क्षेत्रात पदार्पण केले. निला माधव पांडा दिग्दर्शित या चित्रपटात गुलशन ग्रोवर आणि पितोबाश यांसारखे अनुभवी कलाकारही महत्त्वाच्या भूमिकेत होते. पहिल्याच चित्रपटात हर्षने केलेला अभिनय इतका प्रभावी ठरला की तो थेट प्रेक्षकांच्या मनात घर करून गेला.
‘आय अॅम कलाम’ची कथा भारताचे माजी राष्ट्रपती डॉ. ए. पी. जे. अब्दुल कलाम यांच्या विचारांनी प्रेरित आहे. या चित्रपटात हर्षने ‘छोटू’ नावाच्या गरीब पण महत्त्वाकांक्षी मुलाची भूमिका साकारली आहे. राजस्थानच्या पार्श्वभूमीवर उलगडणारी ही कथा रस्त्याच्या कडेला ढाब्यावर काम करणाऱ्या एका बालमजुराच्या आयुष्यावर आधारित आहे. कठीण परिस्थिती असूनही मोठी स्वप्न पाहणारा छोटू हर्षने अतिशय साधेपणाने आणि भावनिक खोलीने साकारला.
त्याच्या नैसर्गिक अभिनयामुळे प्रेक्षक भावूक झाले आणि याच भूमिकेसाठी हर्ष मायरला सर्वोत्कृष्ट बालकलाकाराचा राष्ट्रीय पुरस्कार मिळाला. या चित्रपटाला IMDb वर 7.9 रेटिंग मिळाली असून तो आजही प्रेक्षकांच्या पसंतीस उतरतो.
हर्ष मायरच्या करिअरमधील आणखी एक महत्त्वाचा टप्पा म्हणजे लोकप्रिय वेब सीरिज ‘गुल्लक’. कौटुंबिक नातेसंबंध, भावना आणि सामान्य माणसाचे आयुष्य अत्यंत हळुवारपणे दाखवणाऱ्या या मालिकेत हर्षने जमील खान, गीतांजली कुलकर्णी आणि वैभव राज गुप्ता यांच्यासोबत अभिनय केला. या मालिकेला प्रेक्षक आणि समीक्षकांकडून प्रचंड प्रतिसाद मिळाला असून IMDb वर तिला 9.1 रेटिंग मिळाली आहे.
हर्ष मायरने आतापर्यंत ‘जलपुरी: द डेजर्ट मरमेड’, ‘आधा फुल’, ‘हिचकी’, ‘कानपुरिये’, ‘डिझायर्स ऑफ द हार्ट’ आणि ‘गुल्लक’ अशा अनेक चित्रपट व मालिकांमधून आपली अभिनय क्षमता सिद्ध केली आहे. प्रत्येक भूमिकेत तो वेगळ्या रंगात दिसून येतो.
वर्कफ्रंटबद्दल बोलायचे झाल्यास, हर्ष लवकरच दिग्दर्शक रमन भारद्वाज यांच्या आगामी चित्रपट ‘स्कॉलरशिप’ मध्ये झळकणार आहे. या चित्रपटात कल्की कोचलिन, कोंकणा सेन शर्मा आणि खुशी वर्मा यांसारखे ताकदवान कलाकारही असणार आहेत. कमी वयात मोठा मुकाम गाठणारा हर्ष मायर आज इंडस्ट्रीतील एक विश्वासार्ह आणि उदयोन्मुख अभिनेता म्हणून ओळखला जात आहे.
दैनिक बोंबाबोंबचा व्हॉट्सॲप ग्रुप जॉईन करण्यासाठी या लिंकवर क्लिक करा
हेही वाचा
