बॉलिवूडचा सुपर डांसर, कुल अभिनेता हृतिक रोशनचे चाहते हे जगभरात पसरलेले आहेत. आपल्या दमदार अभिनय आणि कलाकृतीतून त्याने लोकांना आपला जबरा फॅन बनवलंय. १० जानेवारी १९७४ रोजी जन्मलेला हृतिक आज ४७ वा वाढदिवस साजरा करतोय. परंतु, फिटनेसच्या बाबतीत वयाच्या ४७ व्या वर्षीही हृतिक २५ वर्षांच्या मुलांना मागे टाकतो. हृतिकच्या वाढदिवसाच्या निमित्ताने जाणून घेऊयात त्याच्याशी संबंधित काही खास गोष्टी!
हृतिकने बॉलिवूडमध्ये बरेच चित्रपट केले आहेत, परंतु माध्यमांमध्ये त्याच्या चित्रपटांपेक्षा त्याचा घटस्फोटच जास्त चर्चेत राहिला. २०१४ मध्ये जेव्हा हृतिक आणि सुझानच्या घटस्फोटाची बातमी अचानक समोर आली तेव्हा चाहते आश्चर्यचकित झाले.
हृतिक आणि सुझानने २००० मध्ये लग्न केलं आणि लग्नाच्या १४ वर्षानंतर या जोडप्याने विभक्त होण्याचा निर्णय घेतला. त्या दिवसांत हृतिक आणि सुझानच्या घटस्फोटाच्या बातम्या सतत चर्चेत असायच्या.
त्यांच्या घटस्फोटाची बाब ही आश्चर्यचकित करणारी यासाठीही होती कारण त्यांचं एकमेकांवर खूप प्रेम होतं आणी त्यांनी प्रेमविवाह केला होता. आपल्याला ठाऊक आहे का की एका ट्रॅफिक सिग्नलवर या दोघांची प्रेमकथा सुरू झाली.
दोघेही आपआपल्या कारमध्ये बसले होते आणि ट्रॅफिक जाममध्ये अडकले होते. सुझानला पाहताच हृतिक स्वतःचं अस्तित्वच विसरून गेला. हृतिकने कसा तरी सुझानशी संपर्क साधला. सुरुवातीच्या काही छोट्या भेटीनंतर दोघे अनेकदा डेटवर जाऊ लागले. असे करून पुढील दोनच वर्षात त्यांनी लग्न केलं होतं.
लग्नानंतर हृतिक आणि सुझानची गणना बॉलिवूडमधील सर्वोत्कृष्ट जोडप्यांमध्ये झाली होती. परंतु, १४ वर्षानंतर हे संबंध संपुष्टात आले. त्यांच्या घटस्फोटाचं खरं कारण कधीच समोर येऊ शकलं नाही. माध्यमांनुसार, सुझान ही अर्जुन रामपालच्या जवळ जात होती, त्यामुळे दोघांचाही घटस्फोट झाला. याशिवाय असंही म्हटलं जातं की, “काईट्स” चित्रपटाच्या वेळी हृतिक आणि बार्बरा मोरीमध्ये वाढत्या जवळीकीमुळे हृतिकला सुझान सोडून गेली होती.
अर्थात, कारण काहीही असो, दोघांनी परस्पर संमतीने वेगळं होण्याचा निर्णय घेतला होता. या घटस्फोटानंतर हृतिकने सुझानला पोटगी म्हणून जवळजवळ ३८० कोटी रुपये दिले. त्याने दिलेली पोटगीची रक्कम ऐकूनच चाहत्यांना धक्का बसला होता. हृतिक आणि सुझानचा घटस्फोट हा बॉलिवूडमधील सर्वात महागडा घटस्फोट ठरला आहे.
आज हृतिक आणि सुझान एकमेकांपासून विभक्त झाले असले तरी त्यांची मैत्री आजही कायम आहे. दोघेही अतिशय हुशारीने आपल्या मुलांचं संगोपन करतायत. इतकंच नव्हे तर वेगळं राहूनही दोघेही बऱ्याचदा मुलांसोबत वेळ घालवताना एकत्र दिसतात.
