रणबीर कपूरचा (Ranbir Kapoor) ‘रामायण’ हा या वर्षातील सर्वाधिक प्रतीक्षित चित्रपटांपैकी एक आहे. चाहते चित्रपटाबद्दलच्या अपडेट्स आणि झलकची आतुरतेने वाट पाहत होते. रामनवमीच्या निमित्ताने निर्माते रामाचा (रणबीर कपूर) लूक किंवा चित्रपटातील एखादी झलक प्रदर्शित करतील, अशी प्रेक्षकांना आशा होती. पण तसे झाले नाही. आज, सर्वांना रामनवमीच्या शुभेच्छा देताना, निर्मात्यांनी रणबीर कपूरच्या पात्राची पहिली झलक कधी प्रदर्शित केली जाईल, याची घोषणा केली आहे.
चित्रपटाचे निर्माते, नमित मल्होत्रा यांनी आज सर्वांना रामनवमीच्या शुभेच्छा देताना, राम म्हणजेच रणबीर कपूरच्या भूमिकेतील चित्रपटाच्या फर्स्ट लूकबद्दल महत्त्वाची माहिती दिली. नमितने सोशल मीडियावर एक विस्तृत पोस्ट शेअर केली. त्यात लिहिले आहे, “रामनवमीच्या हार्दिक शुभेच्छा! ही कथा आपल्या सर्वांची आहे आणि आम्ही उचललेले प्रत्येक पाऊल हे जबाबदारी, भक्ती आणि समर्पणाच्या खोल भावनेने प्रेरित आहे. आमचे रामायण पूर्ण प्रामाणिकपणाने, त्याच्या मूळ स्वरूपात आणि भव्यतेत जिवंत करण्यासाठी.
२ एप्रिल रोजी हनुमान जयंतीच्या शुभ मुहूर्तावर ‘राम’ची पुढील झलक तुमच्यासोबत शेअर करण्यास आम्ही उत्सुक आहोत. तसेच, एका भव्य प्रकाशन सोहळ्याद्वारे आम्ही आमच्या अनेक वर्षांच्या प्रयत्नांचा परिपाक चाहत्यांसोबत शेअर करणार आहोत. आम्ही हा विशेष क्षण जगभरात साजरा करणार आहोत. तुमच्या प्रेमाबद्दल, विश्वासाबद्दल आणि संयमाबद्दल धन्यवाद.”
रामनवमीला रामायणाच्या अपडेट्सची वाट पाहणाऱ्या चाहत्यांसाठी नमित मल्होत्राची ही पोस्ट थोडी धक्कादायक असली तरी, त्यांची प्रतीक्षा आता आणखी काही दिवसांसाठी वाढली आहे. दरम्यान, चाहते २ एप्रिलची आतुरतेने वाट पाहत आहेत. नमित मल्होत्राने आपल्या पोस्टमधून असेही संकेत दिले आहेत की, तो त्या दिवशी टीमची तयारी किंवा शूटिंगचे अनुभव दाखवणारा एक बीटीएस (पडद्यामागील) व्हिडिओ शेअर करू शकतो.
नितेश तिवारी दिग्दर्शित ‘रामायण’ दोन भागांमध्ये प्रदर्शित होणार आहे. पहिला भाग यावर्षी दिवाळीत, तर दुसरा भाग पुढील वर्षी २०२७ साली दिवाळीत प्रदर्शित होईल. या चित्रपटात रणबीर कपूर रामाच्या भूमिकेत, तर साई पल्लवी सीतेच्या, यश रावणाच्या, सनी देओल हनुमानाच्या आणि रवी दुबे लक्ष्मणाच्या भूमिकेत दिसणार आहेत.
या चित्रपटात अनेक बॉलिवूड तारे महत्त्वाच्या भूमिका साकारत असून, एक मोठी स्टारकास्टही आहे. ‘रामायण’ हा हिंदी चित्रपटसृष्टीतील सर्वात महागड्या आणि भव्य चित्रपटांपैकी एक मानला जातो. या चित्रपटाची निर्मिती नमित मल्होत्रा यांनी केली आहे. चित्रपटाचे संगीत ए. आर. रहमान आणि हॉलिवूड संगीतकार हॅन्स झिमर यांनी दिले आहे.
दैनिक बोंबाबोंबचा व्हॉट्सॲप ग्रुप जॉईन करण्यासाठी या लिंकवर क्लिक करा
हेही वाचा
‘मा का सम’चा वेब सिरीजचा ट्रेलर प्रदर्शित; मोना सिंग आणि मिहिर आहुजा दिसणार नव्या भूमिकेत
