हिंदी चित्रपट जगतात अशा अनेक अभिनेत्री होऊन गेल्या आहेत ज्यांच्या अभिनयाची आणि सौंदर्याची नेहमी चर्चा होत असते. आपल्या दमदार अभिनयाने या अभिनेत्रींनी इतकी लोकप्रियता मिळवली की आजही त्यांच्या नावाची चर्चा होते. या दिवंगत अभिनेत्रीमध्ये स्मिता पाटील (Smita Patil) यांच्या नावाचा प्रामुख्याने समावेश होतो. स्मिता पाटील यांनी आपल्या सहजसुंदर अभिनयाने चित्रपट जगतात आपल्या अभिनयाची वेगळी छाप सोडली होती. त्यांच्याच आठवणींना उजाळा देताना अभिनेत्री रिचा चड्डाने (Richa Chadha) एक खास फोटोशूट केले आहे, ज्याची सध्या सर्वत्र चर्चा सुरू आहे.
रिचा चड्डा ही हिंदी चित्रपट जगतातील एक आघाडीची अभिनेत्री म्हणून ओळखली जाते. रिचा सोशल मीडियावरही नेहमी सक्रिय असते. सध्या तिने दिग्गज दिवंगत अभिनेत्री स्मिता पाटील यांच्या आठवणीत एक खास फोटो सोशल मीडियावर पोस्ट केला आहे. महिला दिनासाठी तयार करण्यात आलेल्या एका मॅगझीनच्या कव्हरपेजसाठी हा ब्लॅक अँड व्हाईट फोटो काढण्यात आला आहे. तिचा हा फोटो स्मिता पाटील यांच्या व्यक्तिरेखेशी अतिशय मिळता जुळता असून, हा फोटो रिचाने आपल्या इंस्टाग्राम अकाऊंटवरून शेअर केला आहे. हा फोटो शेअर करत रिचाने, “दुःखाशी ओळख नसेल तर कसले सुख आणि कसला आनंद, वादळाचा सामना करतानाच समुद्र सुंदर दिसतो.” असे भारी कॅप्शन देखील दिले आहे. या फोटोवर अनेक कलाकारांनी प्रतिक्रिया दिल्या आहेत.
स्मिता पाटील यांनी वयाच्या ३१ व्या वर्षीच जगाचा निरोप घेतला होता. मात्र या अल्पावधीत त्यांनी चित्रपट जगताला आपल्या दमदार अभिनयाने अक्षरशः वेड लावले होते. त्यांच्या नावावर चित्रपट जगतातील २-२ राष्ट्रीय पुरस्कार नोंद आहेत. त्यामुळेच रिचा चड्डाच्या या फोटोवर अनेकजण प्रतिक्रिया देत आहेत. या व्हायरल फोटोवर स्मिता पाटील यांचा मुलगा प्रतिक बब्बरनेही प्रतिक्रिया दिली आहे. त्याचबरोबर अनेक चाहतेही या फोटोचे कौतुक करताना दिसत आहेत. त्याचबरोबर या फोटोने स्मिता पाटील यांची आठवण झाल्याची प्रामणिक भावना अनेकांनी व्यक्त केली आहे.
दैनिक बोंबाबोंचा व्हाट्सअप ग्रुप जॉईन करण्यासाठी या लिंकवर क्लिक करा
