हिंदुस्थानी भाऊ (Hindustani Bhau) हा लोकप्रिय सेलिब्रिटींपैकी एक आहे. त्याचे व्हिडिओ मुख्यतः तरुणांकडून जास्त पाहिले आणि पसंत केले जातात. मात्र आता युट्यूबर आणि सेलिब्रिटी हिंदुस्थानी भाऊचा त्रास वाढला आहे. त्याला पोलिसांनी अटक केली आहे.
खरं तर हिंदुस्थानी भाऊ अर्थातच विकास पाठकवर विद्यार्थ्यांना भडकावल्याचा आरोप आहे. यामुळे धारावी पोलिसांनी गुन्हा दाखल करून, त्याला अटक केली आहे. या प्रकरणी पोलिसांनी इतर अनेकांना देखील अटक केली आहे.
हिंदुस्थानी भाऊने इंस्टाग्रामवर एक व्हिडिओ अपलोड केला होता. या व्हिडिओद्वारे त्याने विद्यार्थ्यांना आंदोलनासाठी भडकावले होते. त्यानंतर सोमवारी (३० जानेवारी) मुंबईतील धारावीमध्ये अनेक विद्यार्थ्यांनी निदर्शने केली. कोरोना महामारीच्या काळात दहावी आणि बारावीच्या परीक्षा ऑफलाईन न होता ऑनलाइन व्हाव्यात, अशी या विद्यार्थ्यांची मागणी आहे.
रिपोर्ट्सनुसार, विकास उर्फ हिंदुस्थानी भाऊ यानेच विद्यार्थ्यांना मुंबईतील शिक्षणमंत्री वर्षा गायकवाड यांच्या निवासस्थानाबाहेर आंदोलन करण्यास सांगितले होते, त्यानंतर विद्यार्थ्यांनी आंदोलन करण्यास सुरुवात केली. पोलीस या प्रकरणाचा तपास करत आहेत. तरीही विद्यार्थ्यांचा संताप कमी झालेला नसून ते आपल्या मागणीवर ठाम आहेत.
त्याचबरोबर दहावी आणि बारावीच्या परीक्षा ऑनलाइनच ठेवाव्यात, असे सरकारला सातत्याने आवाहन केले जात आहे. मुंबईसह नागपूर, पुणे, औरंगाबाद येथेही विद्यार्थी आपल्या मागणीसाठी रस्त्यावर उतरून निदर्शने करत आहेत. अनेक ठिकाणी पोलिसांनी लाठीचार्जही केला आहे. भाजप विद्यार्थ्यांच्या मागणीचे समर्थन करत असून पोलिसांनी केलेल्या लाठीचार्जलाही चुकीचे ठरवले आहे. विद्यार्थ्यांच्या मागणीचा पुन्हा एकदा विचार व्हावा, असे सांगत भाजप नेत्यांनी मुख्यमंत्री उद्धव ठाकरे यांना या प्रकरणात स्वत: हस्तक्षेप करण्याचे आवाहन केले आहे.
त्याचबरोबर दहावी आणि बारावीच्या परीक्षा नियोजित वेळेत ऑफलाईन पद्धतीने घेतल्या जातील, असे बोर्डाने स्पष्ट केले आहे. १०वीच्या परीक्षा २५ फेब्रुवारीपासून तर १२वीच्या परीक्षा १४ फेब्रुवारीपासून सुरू होणार आहेत. यापूर्वीही हिंदुस्थानी भाऊवर कारवाई झाली होती. मुलांच्या परीक्षा रद्द कराव्यात आणि शाळेची फी माफ करावी या मागणीसाठी त्याने मुंबईतील दादर शिवाजी पार्कवर निदर्शने केली होती. यानंतर त्याला कोरोना नियमांचे उल्लंघन केल्याप्रकरणी अटक करण्यात आली.
हिंदुस्थानी भाऊ हा ‘बिग बॉस १३’चा स्पर्धक राहिला आहे. या शोमध्ये त्याचा निराळा अंदाज बराच पसंत केला गेला होता. याच शोमधून त्याची लोकप्रियता वाढली.
हेही वाचा :
