मागील काही काळापासून अनेक बॉलिवूड कलाकारांना आर्थिक संकटांचा सामना करावा लागला आहे. या संकटाचा सामना करताना त्यांना आपल्या घरातील वस्तूही विकाव्या लागल्या. यापैकीच एक म्हणजे अभिनेत्री शगुफ्ता अली होय. शगुफ्ता मागील काही काळापासून आपल्या आयुष्यातील कठीण काळातून जात होत्या. त्यांची आर्थिक परिस्थिती खूपच खराब झाली होती. त्यांना आपल्या उपचारासाठी साठवलेल्या अनेक गोष्टी विकण्याची वेळ आली होती. मात्र, म्हणतात ना, वाईट काळाचा सामना चांगल्याप्रकारे केला, तर वाईट वेळही जास्त काळ राहत नाही. त्यांनी आपली अडचण सांगितली, तेव्हा त्यांच्या मदतीसाठी अनेक बॉलिवूड कलाकार समोर आले आहेत. रोहित शेट्टीपासून ते जॉनी लिव्हरपर्यंत अनेक कलाकारांनी त्यांना मदत केली आहे. यात माधुरी दीक्षितचाही समावेश आहे.
शगुफ्ता यांना बॉलिवूड कलाकारांकडून मिळाली आहेच, पण यासोबतच त्यांना ‘डान्स दीवाने ३’च्या मंचावरही प्रमुख पाहुणे म्हणून बोलावण्यात आले होते. जेणेकरून त्या आपली कहाणी अधिकाधिक लोकांपर्यंत पोहोचवू शकतील. या मंचावर त्यांनी आपल्या आरोग्य आणि आर्थिक परिस्थितीबाबत सांगितले. त्यांची कहाणी ऐकल्यानंतर माधुरीने त्यांची मदत केली. तिने ‘डान्स दीवाने ३’ ची टीम आणि आपल्याकडून शगुफ्ता यांना ५ लाख रुपयांचा चेक दिला होता. इतकी मोठी मदत मिळाल्यानंतर शगुफ्ता यांना बोलण्यासाठी शब्दही कमी पडले. आता त्यांनी आभार मानले आहेत. (Actress Shagufta Ali Express Her Gratitude Towards Dance Deewane 3 And Madhuri Dixit For Giving Her 5 Lakh Rupees Cheque)
‘कॅमेऱ्यासमोर पुन्हा येणे आव्हानात्मक होते’
शगुफ्ता यांनी माध्यमांशी बोलताना म्हटले की, त्यांच्यासाठी ‘डान्स दीवाने ३’च्या मंचावर जाण्याचा अनुभव खूपच चांगला होता. मात्र, पुन्हा कॅमेऱ्यासमोर येणे आव्हानात्मक होते. त्या म्हणाल्या की, “मला डान्स दीवानेच्या मंचावर आपल्या आयुष्यातील त्या गोष्टींबद्दल चर्चा करण्यासाठी आमंत्रित केले होते, ज्यांचा मी सामना करत आहे. मी त्या शोमध्ये सर्व प्रतिभावान स्पर्धकांची चाहती आहे आणि मी त्या सर्वांना भेटण्यासाठी खूपच उत्सुक होते. मात्र, चार वर्षांनंतर कॅमेऱ्यासमोर पुन्हा येणे माझ्यासाठी आव्हानात्मक होते.”
‘जेव्हा माधुरीने चेक दिला, तेव्हा मी झाले हैराण’
पुढे बोलताना शगुफ्ता म्हणाल्या की, त्यांचा अनुभव खूप चांगला होता. मात्र, जेव्हा ‘डान्स दीवाने ३’ची परीक्षक माधुरी दीक्षितने पुढे येऊन त्यांच्या हातात ५ लाख रुपयांचा चेक दिला, तेव्हा त्या हैराण झाल्या आणि तोंडातून काहीच शब्द निघाले नाहीत. त्या म्हणाल्या, “पुन्हा कॅमेऱ्यासमोर येण्यात मला थोडी अडचण होती. मात्र, मला वाटले की, जर मी या मंचावर आपला अनुभव शेअर केला, तर मी अधिकाधिक लोकांपर्यंत पोहोचू शकेल. जेव्हा मंचावर माझ्या हातात माधुरीने चेक दिला, तेव्हा त्यावेळी बोलण्यासाठी माझ्याकडे शब्दच नव्हते.”
शोमध्ये मिळाले प्रेम आणि सन्मान
‘डान्स दीवाने ३’मधील आपला अनुभव शेअर करताना शगुफ्ता अली यांनी सांगितले की, “हे मन जिंकणारे होते, जेव्हा माधुरीला आमच्यासोबत एकत्र काही वर्षांपूर्वी केलेल्या एका प्रोजेक्टची आठवण आली. मी या शोमध्ये आपली कहानी सांगण्यासाठी नक्कीच आले होते, परंतु मला माहिती नव्हते की, मला या शोमधून इतके प्रेम आणि सन्मान मिळेल.”
या मंचावर शगुफ्ता अली यांनी आपली आर्थिक स्थितीबाबत सांगितले होते. सोबतच त्यांनी म्हटले होते की, “मागील ४ वर्षांपासून खूप सारे ऑडिशन झाले, खूप गोष्टी झाल्या, परंतु काही वर्कआऊट झाले नव्हते. यादरम्यान मधुमेहामुळे माझ्या पायाच्या समस्या वाढल्या. त्याचा माझ्या डोळ्यांवर खूप परिणाम झाला. या चार वर्षांमधील त्रास मला सहन झाला नाही. ही इंडस्ट्री माझ्यासाठी माझे घर आहे. मी इथे ३६ वर्षे घालवली आहेत.”
या शो आणि चित्रपटात केले काम
शगुफ्ता यांच्या कामकाजाबद्दल बोलायचं झालं, त्यांनी आपल्या कारकिर्दीची सुरुवात सन १९८९ मध्ये टीव्ही शो ‘दर्द’मधून केली होती. त्यावर्षी त्यांनी ‘कानून अपना अपना’मध्येही काम केले. याव्यतिरिक्त त्यांनी बॉलिवूडमध्ये ‘हीरो नंबर १’, ‘सिर्फ तुम’, ‘अजूबा’, ‘इंटरनॅशनल खिलाडी’ यांसारख्या चित्रपटात काम केले आहे.
दुसरीकडे त्यांनी टीव्हीवरील ‘एक वीर की अरदास वीरा’, ‘पुनर्विवाह’ आणि ‘बेपनाह’ यांसारख्या शोमध्ये काम केले आहे.
दैनिक बोंबाबोंबचे टेलिग्राम चॅनेल जॉईन करण्यासाठी येथे क्लिक करा…