टीव्ही इंडस्ट्रीतून एक धक्कादायक आणि गंभीर बातमी समोर आली आहे. प्रसिद्ध टीव्ही अभिनेता अनुज सचदेवा याच्यावर मुंबईतील गोरेगाव येथील त्याच्याच सोसायटीमध्ये हल्ला झाल्याचा आरोप त्याने केला आहे. अनुजने सोशल मीडियावर व्हिडिओ शेअर करत एका व्यक्तीने आपल्यावर शारीरिक हल्ला केल्याचा आणि जीवे मारण्याची धमकी दिल्याचा दावा केला आहे. हा व्हिडिओ सध्या सोशल मीडियावर मोठ्या प्रमाणात व्हायरल होत आहे.
अनुज सचदेवा ‘ये रिश्ता क्या कहलाता है’, ‘साथ निभाना साथिया’ (Sath nibbana sathiya )आणि ‘मन की आवाज प्रतिज्ञा’ यांसारख्या लोकप्रिय मालिकांसाठी ओळखला जातो. त्याने इंस्टाग्रामवर शेअर केलेल्या व्हिडिओमध्ये एक व्यक्ती त्याच्यावर काठीने हल्ला करताना, शिवीगाळ करताना आणि धमक्या देताना स्पष्टपणे दिसला. अभिनेत्याच्या म्हणण्यानुसार, सोसायटीतील एका रहिवाशाने त्याच्या कुत्र्याने आपल्याला चावल्याचा आरोप केला, त्यानंतर वाद उफाळून आला आणि तो हिंसक झाला.
आरोपी म्हणला “तुला कुत्रा चावेल का?” असे ओरडत अनुजवर वार करताना दिसतो. या दरम्यान पार्श्वभूमीत एका महिलेचा आवाज ऐकू येतो, जी चौकीदाराला बोलावण्याचा प्रयत्न करत आहे. काही वेळातच सुरक्षा रक्षक घटनास्थळी पोहोचले आणि त्यांनी त्या व्यक्तीला अनुजपासून दूर केले. मात्र तोपर्यंत अनुज जखमी झाला होता. हल्ल्यानंतर तो कॅमेऱ्यासमोर आला असून त्याच्या डोक्यातून रक्त येत असल्याचेही दिसते.
या घटनेमागील कारण स्पष्ट करताना अनुजने सांगितले की, सोसायटीतील पार्किंगवरून हा वाद सुरू झाला. त्यानंतर त्या व्यक्तीने त्याच्यावर आणि त्याच्या कुत्र्यावर हल्ला केला. अनुजने सोशल मीडियावर सोसायटीचे नाव आणि आरोपीचा फ्लॅट नंबरही शेअर करत कठोर कारवाईची मागणी केली आहे. भविष्यात आपल्याला किंवा आपल्या मालमत्तेला काहीही धोका निर्माण झाल्यास हा व्हिडिओ पुरावा ठरेल, असेही त्याने पोस्टमध्ये नमूद केले आहे.
या घटनेनंतर टीव्ही इंडस्ट्रीतील अनेक कलाकारांनी चिंता व्यक्त केली आहे. किश्वर मर्चंट, सिंपल कौर, विवान भटेना आणि नौहीद सायरसी यांसारख्या कलाकारांनी कमेंट करून अनुजला पाठिंबा दिला असून तातडीने पोलिसांत तक्रार दाखल करण्याचा सल्ला दिला आहे.
महत्त्वाचे म्हणजे, अनुज सचदेवा हा पाळीव प्राणी आणि भटक्या कुत्र्यांच्या हक्कांसाठी नेहमीच आवाज उठवत आला आहे. तो अनेकदा आपल्या पाळीव कुत्र्यासोबत दिसतो आणि प्राणी दत्तक घेण्याचे व त्यांची जबाबदारीने काळजी घेण्याचे महत्त्व सांगत असतो. या घटनेनंतर सेलिब्रिटींच्या सुरक्षिततेसह सोसायटीमधील अंतर्गत सुरक्षेवरही प्रश्नचिन्ह उपस्थित झाले आहे.
दैनिक बोंबाबोंबचा व्हॉट्सॲप ग्रुप जॉईन करण्यासाठी या लिंकवर क्लिक करा
हेही वाचा
‘वर्षानुवर्षे वेदना आणि…’, मल्याळम अभिनेत्री पीडितेने पहिल्यांदाच अत्याचार प्रकरणावर सोडले मौन
