टेलिव्हिजनचा प्रसिद्ध रियॅलिटी शो आणि सर्वात वादग्रस्त शोपैकी एक असलेला बिग बॉसचा १५ वा सीझन पूर्ण झाला आहे. रविवारी (३० जानेवारी) ‘बिग बॉस १५’चा ग्रँड फिनाले झाला. त्याचवेळी ‘बिग बॉस १५’ ट्रॉफीवर शोची बबली मेंबर असलेल्या तेजस्वी प्रकाशने (Tejasswi Prakash) आपले नाव कोरले. त्याचवेळी, शोमध्ये सुरुवातीपासूनच मजबूत स्पर्धकाप्रमाणे दिसणारा प्रतीक सहजपाल (Pratik Sehajpal) या सीझनचा फर्स्ट रनर अप होता. बिग बॉस ओटीटीमधून थेट बिग बॉस १५ मध्ये आपले स्थान निर्माण करणाऱ्या प्रतीक सहजपालने या संपूर्ण सीझनमध्ये प्रेक्षकांचे मनोरंजन केले आहे. याच कारणामुळे शोच्या सुरुवातीपासूनच तो या सीझनचा सर्वात मजबूत स्पर्धक मानला जात होता.
इतकंच नाही, तर शोदरम्यान प्रतीकचा परफॉर्मन्स पाहून अनेक चाहते त्याला ‘बिग बॉस १५’ ट्रॉफीसाठी पात्र मानत होते. मात्र, प्रचंड मेहनत करूनही प्रतीक विजयापासून केवळ एक पाऊल दूर होता. बिग बॉस १५ मधील त्याच्या प्रवासाबद्दल बोलायचे झाले, तर प्रतीक सुरुवातीपासूनच त्याच्या आक्रमक स्वभावामुळे या सीझनचा लोकप्रिय सदस्य आहे. सुरुवातीच्या काळात तो राग आणि भांडणासाठीही प्रसिद्ध होता. मात्र, नंतर आपल्या खेळात सुधारणा करत प्रतीकने आपल्या आक्रमक स्वभावात बरीच सुधारणा केली.
दिसला आहे अनेक रियॅलिटी शोमध्ये
इतकंच नाही, तर प्रतीक शोमधील अनेक अभिनेत्रींसोबतच्या नात्यामुळेही चर्चेत राहिला. शो दरम्यान त्याची आकासा, नेहा भसीन आणि देवोलीना भट्टाचार्जी यांच्याशी चांगली बॉन्डिंग होती. टीव्ही अभिनेता असण्यासोबतच प्रतीक हा फिटनेस ट्रेनर आणि मॉडेल देखील आहे. मॉडेल म्हणून आपल्या करिअरची सुरुवात करणारा प्रतीक बिग बॉसच्या आधी ‘स्प्लिट्सविला’, ‘लव्ह स्कूल सीझन ३’, ‘एस ऑफ स्पेस’ यासारख्या अनेक रियॅलिटी शोमध्ये दिसला आहे.
मध्यमवर्गीय कुटुंबातील आहे प्रतीक
प्रतीकचा जन्म १२ मे १९९३ रोजी झाला. प्रतीक मूळचा दिल्लीचा असून, तो एका मध्यमवर्गीय कुटुंबातील आहे. त्याची आई गृहिणी असून वडील एका खाजगी कंपनीत कर्मचारी आहेत. प्रतीकच्या बहिणीचे नाव प्रेरणा सहजपाल असून, ती व्यवसायाने मेकअप आर्टिस्ट आहे. प्रतीकचे शालेय शिक्षण दिल्लीतूनच झाले. त्याने पुढील शिक्षण अ‍ॅमिटी येथून केले जेथे त्याने कायद्यातील पदवी पूर्ण केली.
बॉडी बिल्डिंगची जिंकली स्पर्धा
प्रतीकला लहानपणापासूनच बॉडी बिल्डिंगची आवड होती. त्याला नेहमीच फिटनेसमध्ये करिअर करायचे होते. २०१८ मध्ये प्रतीक सहजपालने बॉडी बिल्डिंगची स्पर्धाही जिंकली होती. प्रतिक सहजपाल सुरुवातीपासूनच थोडा रागीट आहे. त्याचा राग प्रत्येक रियॅलिटी शोमध्ये पाहायला मिळाला आहे. ‘बिग बॉस ओटीटी’मध्ये प्रतीक सहजपालला ‘अँग्री यंग मॅन’ ही पदवी देखील मिळाली.
१४ वर्षांनी मोठ्या अभिनेत्रीला केलंय डेट
‘बिग बॉस’च्या या सीझनमध्ये प्रतीक सहजपालचे नाव अनेक अभिनेत्रींसोबत जोडले गेले. मात्र, प्रतीकने टीव्हीची प्रसिद्ध अभिनेत्री आणि ‘बिग बॉस १४’ची स्पर्धक पवित्रा पुनियाला डेट केले आहे. पवित्रा पुनिया प्रतीकपेक्षा १४ वर्षांनी मोठी आहे. बिग बॉस ओटीटीमध्ये येण्यापूर्वी प्रतीक सहजपालने त्याचे आणि पवित्राचे नाते अतिशय तणावपूर्ण असल्याचे सांगितले जात होते. त्यांच्यात खूप भांडण झाले होते आणि भांडणात पवित्राने घराची तोडफोड केल्याचेही सांगितले जात होते.
हेही वाचा :
‘बिग बॉस १५’ ला मिळाली विजेती स्पर्धक, ट्रॉफीवर कोरले तेजस्वी प्रकाशचे नाव
शाहिद आणि मीराची जोडी पुन्हा एकदा आली चर्चेत, सोशल मीडियावर व्हायरल होतोय नवा फोटो
‘हे’ आहेत आलिया भट्टच्या करिअरला कलाटणी देणारे सुपरहिट चित्रपट, वाचा संपूर्ण यादी
