‘या’ कारणामुळे जावेद अलीने बदलले आपले नाव; ‘एक दिन तेरी राहों में’ गाण्याने मिळाले अफाट यश


‘तुम मिले’, ‘कुन फाया कुन’ यांसारखी सुपरहिट गाणी बॉलिवूडला देणारा गायक म्हणजे जावेद अली. त्याने हिंदी चित्रपटासोबत तमिळ, तेलुगू, मल्याळम, कन्नड, बंगाली आणि मराठी भाषेत देखील गाणी गायली आहेत. सोमवारी (५ जुलै) जावेद अली आपला 39 वा वाढदिवस साजरा आहे. जावेद अलीचा जन्म 5 जुलै, 1982 मध्ये दिल्ली येथे झाला होता. त्याचे वडील उस्ताद हमीद एक कव्वाली गायक होते. आज त्याच्या वाढदिवसानिमित्त जाणून घेऊया त्याच्या आयुष्यातील काही गोष्टी. (Birthday special : let’s know the career journey of javed ali)

जावेद अलीने 2000 साली बॉलिवूडमध्ये पदार्पण केले. गोविंदाचा चित्रपट ‘बेटी नंबर 1’ मध्ये त्याने पहिल्यांदा गाणे गायले. त्याच्या अनेक चाहत्यांना ही गोष्ट माहीत देखील नसेल की, जावेद अलीचे खरे नाव जावेद हुसैन होते. त्याने त्याचे नाव बदलण्यामागे एक खास कारण आहे. जावेदला आज संपूर्ण देशात ओळखले जाते. त्याने त्याचे गुरू गुलाम अली यांना श्रद्धांजली अर्पण करताना त्याचे नाव जावेद अली असे ठेवले. त्याला त्याच्या गुरूप्रमाणे गझल गायक बनायचे होते, पण त्याचे ते स्वप्न अपूर्ण राहिले.

जावेद अलीने अनेक हिंदी चित्रपटात गाणी गायली आहेत. परंतु त्याला 2007 मध्ये ‘नकाब’ या चित्रपटातील ‘एक दिन तेरी राहो में’ या गाण्याने अफाट यश आणि खरी ओळख मिळाली. त्यानंतर त्याने ऋतिक रोशन आणि ऐश्वर्या रायच्या ‘जोधा अकबर’ या चित्रपटातील ‘कहने को जश्न बहारा है’ हे गाणे गायले. या दोन गाण्यांनी त्याला बॉलिवूडमध्ये चांगलीच ओळख मिळाली.

जावेद अलीने त्याच्या करिअरची सुरुवात झी टीव्हीवरील सिंगिंग बेस्ट रियॅलिटी शो ‘सारेगामापा लिटिल चॅम्प’चे परीक्षक म्हणून केली. त्याने रणबीर कपूरच्या ‘रॉकस्टार’ चित्रपटातील ‘कुन फाया कुन’, ‘नगाडा नगाडा’, ‘तू जो मिला’, ‘दीवाना कर रहा है’ यांसारखी अनेक सुपरहिट गाणी बॉलिवूडला दिली आहेत.

याव्यतिरिक्त त्याला आपल्या गायनासाठी आणि परीक्षणासाठी अनेक पुरस्कार मिळाले आहेत. त्यात ‘मिर्ची म्युझिक अवॉर्ड फॉर क्रिटिक चॉईस’, ‘आयआयएफए अवॉर्ड फॉर बेस्ट मेल प्लेबॅक सिंगर’, ‘झी रिश्ते अवॉर्ड फॉर फेव्हरेट जज’ यांसारख्या अनेक पुरस्कारांचा समावेश आहे.

दैनिक बोंबाबोंबचे टेलिग्राम चॅनेल जॉईन करण्यासाठी येथे क्लिक करा…


Leave A Reply

Your email address will not be published.