‘द फॅमिली मॅन २’ मधील आपल्या अभिनयाने सर्वांना प्रभावित केल्यानंतर, समंथा रुथ प्रभू (Samantha Ruth Prabhu) बॉलिवूडमध्ये पदार्पण करण्यासाठी सज्ज झाली आहे. मिळालेल्या माहितीनुसार, समंथा लवकरच आयुष्मान खुरानासोबत (Ayushmann Khurrana) स्क्रीन शेअर करताना दिसणार आहे. मीडिया रिपोर्ट्सनुसार, तिने बॉलिवूडमध्ये पदार्पण करण्यासाठी हा चित्रपटही साइन केला आहे.
नवीन अहवालात असा दावा करण्यात आला आहे की, हा चित्रपट दिनेश विजानच्या प्रोडक्शन हाऊसद्वारे तयार केला जाईल. कागदोपत्री काम पूर्ण झाले असून, सध्या शूटिंगचे वेळापत्रक आणि तारखा निश्चित होत असल्याचे सांगण्यात येत आहे. रिपोर्टनुसार, निर्मात्यांनी सध्या सर्व गोष्टी लपवून ठेवल्या आहेत. असे सांगितले जात आहे की, या चित्रपटाचे शूटिंग या वर्षाच्या अखेरीस पूर्ण होऊ शकते आणि २०२३च्या अखेरीस तो प्रदर्शित होईल. (samantha ruth prabhu is ready for her bollywood debut)
रिपोर्टमध्ये असा दावाही करण्यात आला आहे की, समंथाने तिचा दुसरा हिंदी चित्रपटही साइन केला आहे. हा एक पौराणिक चित्रपट असेल, ज्याचे शूटिंग २०२३ मध्ये सुरू होऊ शकते. सिनेसृष्टीत सुरू असलेल्या चर्चांवर विश्वास ठेवला, तर करण जोहरच्या (Karan Johar) पुढच्या चित्रपटात ती अक्षय कुमारसोबत (Akshay Kumar) दिसणार असल्याचे बोलले जात आहे. दोघे लवकरच करणच्या चॅट शोमध्येही एकत्र दिसणार आहेत.
विशेष म्हणजे, समंथा हे साऊथ फिल्म इंडस्ट्रीतील एक प्रसिद्ध नाव आहे. तिने आपल्या फिल्मी करिअरमध्ये अनेक सुपरहिट चित्रपट दिले आहेत. नुकतेच ‘पुष्पा’ चित्रपटातील तिचे ‘ऊ अंटवा’ हे गाणे खूप हिट ठरले. तिने या गाण्यात आपल्या दमदार अभिनयाने इंटरनेटवर धुमाकूळ घातला. ही अभिनेत्री लवकरच विजय देवरकोंडासोबत (Vijay Devarkonda) ‘कुशी’ या चित्रपटात दिसणार आहे. हा चित्रपट यावर्षी २३ डिसेंबरला रिलीझ होणार आहे. या चित्रपटाचे दिग्दर्शन शिवा निर्वाण यांनी केले आहे.
दैनिक बोंबाबोंबचा व्हाट्सअप ग्रूप जॉईन करण्यासाठी या लिंकवर क्लिक करा
हेही वाचा
